Nature à vostre naistre heureusement feconde

Nature à vostre naistre heureusement feconde,

Prodigue vous donna tout son plus et son mieux,

Soit ceste grand’ douceur qui luit dedans vos yeux,

Soit ceste majesté disertement faconde.

Vostre rare vertu, qui n’a point de seconde,

Et vostre esprit ailé, qui voisine les cieux,

Vous ont donné le lieu le plus prochain des Dieux,

Et la plus grand’ faveur du plus grand Roy du monde.

Bref, vous avez tout seul tout ce qu’on peut avoir

De richesse, d’honneur, de grace, et de sçavoir :

Que voulez-vous donc plus esperer d’avantage ?

Le libre jugement de la posterité,

Qui, encor’ qu’ell’ assigne au ciel vostre partage,

Ne vous donnera pas ce qu’avez merité.