N’estant, comme je suis, encor exercité

N’estant, comme je suis, encor exercité

Par tant et tant de maux au jeu de la Fortune,

Je suivois d’Apollon la trace non commune,

D’une saincte fureur sainctement agité.

Ores ne sentant plus ceste divinité,

Mais picqué du souci qui fascheux m’importune,

Une adresse j’ay pris beaucoup plus opportune

A qui se sent forcé de la necessité.

Et c’est pourquoy (Seigneur) ayant perdu la trace

Que suit vostre Ronsard par les champs de la Grace,

Je m’adresse où je voy le chemin plus battu :

Ne me bastant le cœur, la force, ni l’haleine,

De suivre, comme luy, par sueur et par peine,

Ce penible sentier qui meine à la vertu.