Mauny, prenons en gré la mauvaise fortune

Mauny, prenons en gré la mauvaise fortune,

Puis que nul ne se peut de la bonne asseurer,

Et que de la mauvaise on peut bien esperer,

Estant son naturel de n’estre jamais une.

Le sage nocher craint la faveur de Neptune,

Sçachant que le beau temps long temps ne peut durer :

Et ne vaut-il pas mieux quelque orage endurer,

Que d’avoir tousjours peur de la mer importune ?

Par la bonne fortune on se trouve abusé,

Par la fortune adverse on devient plus rusé :

L’une esteint la vertu, l’autre la fait paroistre :

L’une trompe nos yeux d’un visage menteur,

L’autre nous fait l’ami cognoistre du flatteur,

Et si nous fait encor’ à nous mesme cognoistre.