Encores que lon eust heureusement compris

Encores que lon eust heureusement compris

Et la doctrine Grecque, et la Romaine ensemble,

Si est-ce (Gohorry) qu’ici, comme il me semble,

On peut apprendre encor’, tant soit-on bien appris.

Non pour trouver ici de plus doctes escrits

Que ceux que le François soigneusement assemble,

Mais pour l’air plus subtil, qui doucement nous emble

Ce qui est plus terrestre et lourd en nos esprits.

Je ne sçay quel Demon de sa flamme divine

Le moins parfait de nous purge, esprouve, et affine,

Lime le jugement, et le rend plus subtil.

Mais qui trop y demeure, il envoye en fumee

De l’esprit trop purgé la force consumee,

Et pour l’esmoudre trop, lui fait perdre le fil.