LES REGRETS DE JOACHIM DU BELLAY ANGEVIN · XXXVIII
Ô qu’heureux est celuy qui peut passer son aage
Les Regrets, Joachim du Bellay (1558)·Texte intégral, poème 38 sur 193·Livre complet →
Ô qu’heureux est celuy qui peut passer son aage
Entre pareils à soy ! et qui sans fiction,
Sans crainte, sans envie, et sans ambition,
Regne paisiblement en son pauvre mesnage !
Le miserable soin d’acquerir d’avantage
Ne tyrannise point sa libre affection,
Et son plus grand desir, desir sans passion,
Ne s’estend plus avant que son propre heritage,
Il ne s’empesche point des affaires d’autruy,
Son principal espoir ne depend que de luy,
Il est sa court, son roy, sa faveur, et son maistre.
Il ne mange son bien en païs estranger,
Il ne met pour autruy sa personne en danger,
Et plus riche qu’il est ne voudroit jamais estre.