ODE XXII.

N’aguere chanter je voulois

Comme Francus au bord Gaulois

Avec sa troupe vint descendre,

Mais son luth pincé de mon doy

Ne vouloit en despit de moy

Que chanter Amour, et Cassandre.

Je pensois, d’autant que tousjours

J’avois dit sur luy mes amours,

Que ses cordes par long usage

Chantoient d’Amour, et qu’il falloit

En mettre d’autres, s’on vouloit

Luy apprendre un autre langage.

Incontinent, il n’y eut fust,

Table ny corde, qui ne fust,

Ny chevilles, toutes nouvelles :

Mais apres qu’il fut remonté,

Plus fort que devant a chanté

Les Amours et les Damoiselles.

Or adieu donq pauvre Francus,

Ta gloire sous tes murs veincus

Se cachera tousjours pressée,

Si à ton neveu nostre Roy

Tu ne dis, qu’en l’honneur de toy

Il face ma lyre crossée.