Ursin, quand j’oy nommer de ces vieux noms Romains

Ursin, quand j’oy nommer de ces vieux noms Romains,

De ces beaux noms cognus de l’Inde jusqu’au More,

Non les grands seulement, mais les moindres encore,

Voire ceux-là qui ont les ampoulles aux mains :

Il me fasche d’ouïr appeller ces villains

De ces noms tant fameux que tout le monde honore :

Et sans le nom Chrestien, le seul nom que j’adore,

Voudrois que de tels noms on appellast nos Saints.

Le mien sur tous me fasche, et me fasche un Guillaume,

Et mil autres sots noms communs en ce royaume,

Voyant tant de facquins indignement jouir

De ces beaux noms de Rome, et de ceulx de la Grece :

Mais par sur tout, Ursin, il me fasche d’ouïr

Nommer une Thaïs du nom d’une Lucrece.