LES REGRETS DE JOACHIM DU BELLAY ANGEVIN · CLXIII
Il ne faut point, Duthier, pour mettre en evidence
Les Regrets, Joachim du Bellay (1558)·Texte intégral, poème 163 sur 193·Livre complet →
Il ne faut point, Duthier, pour mettre en evidence
Tant de belles vertus qui reluisent en toy,
Que je te rende icy l’honneur que je te doy,
Celebrant ton sçavoir, ton sens, et ta prudence.
Le bruit de ta vertu est tel, que l’ignorance
Ne le peut ignorer: et qui louë le Roy,
Il faut qu’il louë encor’ ta prudence, et ta foy :
Car ta gloire est conjointe à la gloire de France.
Je diray seulement que depuis nos ayeux
La France n’a point veu un plus laborieux
En sa charge que toy, et qu’autre ne se treuve
Plus courtois, plus humain, ne qui ait plus de soin
De secourir l’amy à son plus grand besoin.
J’en parle seurement, car j’en ay fait l’espreuve.