Combien que ton Magny ait la plume si bonne

Combien que ton Magny ait la plume si bonne,

Si prendrois-je avec luy de tes vertus le soin,

Sachant que Dieu, qui n’a de nos presens besoin,

Demande les presens de plus d’une personne.

Je dirois ton beau nom, qui de luy-mesme sonne

Ton bruit parmi la France, en Itale, et plus loin :

Et dirois que Henry est luy-mesme tesmoin,

Combien un Avanson avance sa couronne.

Je dirois ta bonté, ta justice, et ta foy,

Et mille autres vertus qui reluisent en toy,

Dignes qu’un seul Ronsard les sacre à la Memoire :

Mais sentant le souci qui me presse le dos,

Indigne je me sens de toucher à ton los,

Sachant que Dieu ne veut qu’on prophane sa gloire.