Si tu veux seurement en Court te maintenir

Si tu veux seurement en Court te maintenir,

Le silence, Ronsard, te soit comme un decret.

Qui baille à son amy la clef de son secret,

Le fait de son amy son maistre devenir.

Tu dois encor’, Ronsard, ce me semble, tenir

Aveq’ ton ennemi quelque moyen discret,

Et faisant contre luy, monstrer qu’à ton regret

Le seul devoir te fait en ces termes venir.

Nous voyons bien souvent une longue amitié

Se changer pour un rien en fiere inimitié,

Et la haine en amour souvent se transformer,

Dont (veu le temps qui court) il ne faut s’esbahir,

Aime donques, Ronsard, comme pouvant haïr,

Hays donques, Ronsard, comme pouvant aimer.