Celuy qui d’amitié a violé la loy

Celuy qui d’amitié a violé la loy,

Cerchant de son amy la mort et vitupere,

Celuy qui en procez a ruiné son frere,

Ou le bien d’un mineur a converty à soy :

Celuy qui a trahi sa patrie et son Roy,

Celuy qui comme Œdipe a fait mourir son pere,

Celuy qui comme Oreste a fait mourir sa mere,

Celuy qui a nié son baptesme et sa foy :

Marseille, il ne faut point que pour la penitence

D’une si malheureuse abominable offense,

Son estomac plombé martelant nuict et jour,

Il voise errant nuds pieds ne six ne sept années :

Que les Grisons sans plus il passe à ses journees,

J’entens, s’il veut que Dieu luy doive du retour.