Seigneur, ne pensez pas d’ouïr chanter ici

Seigneur, ne pensez pas d’ouïr chanter ici

Les louanges du Roy, ni la gloire de Guise,

Ni celle que se sont les Chastillons acquise,

Ni ce Temple sacré au grand Montmorenci.

Ni pensez voir encor’ le severe sourci,

De madame Sagesse, ou la brave entreprise,

Qui au Ciel, aux Dœmons, aux Estoiles s’est prise,

La Fortune, la Mort, et la Justice aussi :

De l’or encore moins, de luy je ne suis digne :

Mais bien d’un petit chat j’ay fait un petit hymne,

Lequel je vous envoye : autre present je n’ay.

Prenez le donc, (Seigneur) et m’excusez de grace,

Si pour le bal ayant la musique trop basse,

Je sonne un passepied, ou quelque branle gay.