Cependant que Magny suit son grand Avanson

Cependant que Magny suit son grand Avanson,

Panjas son Cardinal, et moy le mien encore,

Et que l’espoir flateur, qui nos beaux ans devore,

Appaste nos desirs d’un friand hameçon

Tu courtises les Roys, et d’un plus heureux son

Chantant l’heur de Henry, qui son siecle decore,

Tu t’honores toy mesme, et celuy qui honore

L’honneur que tu luy fais par ta docte chanson.

Las, et nous ce pendant nous consumons nostre aage

Sur le bord incogneu d’un estrange rivage,

Où le malheur nous fait ces tristes vers chanter :

Comme on voit quelquefois quand la mort les appelle,

Arrangez flanc à flanc parmi l’herbe nouvelle,

Bien loin sur un estang trois cygnes lamenter.