Si celuy qui s’appreste à faire un long voyage

Si celuy qui s’appreste à faire un long voyage,

Doit croire cestuy là qui a jà voyagé,

Et qui des flots marins longuement outragé,

Tout moite et degoutant s’est sauvé du naufrage :

Tu me croiras (Ronsard) bien que tu sois plus sage,

Et quelque peu encor (ce croy-je) plus aagé,

Puis que j’ay devant toy en ceste mer nagé,

Et que desjà ma nef descouvre le rivage.

Donques je t’advertis, que ceste mer Romaine

De dangereux escueils et de bancs toute pleine,

Cache mille perils, et qu’ici bien souvent,

Trompé du chant pipeur des monstres de Sicile,

Pour Charybde eviter tu tomberas en Scyle,

Si tu ne sçais nager d’une voile à tout vent.