ODE XL.

Celuy qui n’aime est malheureux,

Et malheureux est l’amoureux :

Mais la misere la plus grande,

C’est quand l’amant (apres avoir

En bien servant fait son devoir)

Ne reçoit point ce qu’il demande.

La race en amours ne sert rien,

Ne beauté, grace, ne maintien :

Sans honneur la Muse gist morte :

Les amoureuses du jourd’huy

En se vendant, aiment celuy

Laid ou beau, qui le plus apporte.

Puisse mourir meschantement

Qui l’or trouva premierement :

Par luy le frere n’est pas frere,

Le pere n’est pas pere seur,

Par luy la sœur n’est pas la sœur,

Et la mere n’est pas la mere.

Par luy la guerre et le discord,

Par luy les glaives et la mort,

Par luy viennent mille tristesses :

Et qui pis est, nous recevons

La mort par luy, nous qui vivons

Amoureux d’avares maistresses.