ODE XXVI.

Du grand Turc je n’ay souci,

Ny du grand Souldan aussi :

L’or ne maistrise ma vie,

Aux Rois je ne porte envie :

J’ay soucy tant seulement

De parfumer cointement

Ma barbe, et qu’une couronne

De fleurs le chef m’environne.

Le soin de ce jour me point,

Du demain je n’en ay point.

Qui (bons Dieux !) pourroit cognoistre

Si un lendemain doit estre ?

Vulcan, en faveur de moy,

Je te pri’ despesche toy

De me tourner une tasse,

Qui de profondeur surpasse

Celle du vieillard Nestor :

Je ne veux qu’elle soit d’or,

Sans plus fay la moy de chesne,

Ou de lhyerre, ou de fresne.

Ne m’engrave point dedans

Ces grands panaches pendans,

Plastrons, morions, ny armes :

Qu’ay-je soucy des alarmes,

Des assaux, ou des combas ?

Aussy ne m’y grave pas

Ny le Soleil, ny la Lune,

Ny le jour, ny la nuict brune,

Ny les Astres radieux :

Et quel soin ay-je des cieux ?

De leurs Ours, de leur Charrette,

D’Orion, ou de Boëtte ?

Mais pein moy je te supply,

D’une treille le reply

Non encore vendangée :

Peins une vigne chargée

De grappe et de raisins,

Peins y des fouleurs de vins,

Le nez et la rouge trongne

D’un Silene, et d’un yvrongne.