ODE XXXII.

Les Muses lierent un jour

De chaisnes de roses, Amour,

Et pour le garder le donnerent

Aux Graces et à la Beauté,

Qui voyans sa desloyauté,

Sus Parnasse l’emprisonnerent.

Si tost que Venus l’entendit,

Son beau ceston elle vendit

A Vulcan, pour la delivrance

De son enfant, et tout soudain

Ayant l’argent dedans la main,

Fist aux Muses la reverence.

Muses Déesses des chansons,

Quand il faudroit quatre rançons

Pour mon enfant, je les apporte,

Delivrez mon fils prisonnier :

Mais les Muses l’ont fait lier

D’une autre chaisne bien plus forte.

Courage doncques amoureux,

Vous ne serez plus langoureux,

Amour est au bout de ses ruses :

Plus n’oseroit ce faux garson

Vous refuser quelque chanson,

Puis qu’il est prisonnier des Muses.