LE QUATRIESME LIVRE DES ODES
ODE XXXVIII.
Les Odes, Pierre de Ronsard (1550)·Texte intégral, ode 132 sur 185·Livre complet →
Ha, si l’or pouvoit allonger
D’un quart d’heure la vie aux hommes,
De soin on devroit se ronger
Pour l’entasser à grandes sommes :
Afin qu’il peust servir de pris
Et de rançon à nostre vie,
Et que la mort en l’ayant pris,
De nous tuer n’eust plus envie.
Mais puis qu’on ne la peut tarder
Pour don, ny pour or qu’on luy offre,
Que me serviroit de garder
Un tresor moisy dans mon coffre ?
Il vaut mieux Jamin, s’addonner
A fueilleter tousjours un livre,
Qui plustost que l’or peut donner
Maugré la mort, un second vivre.