ODE IIII. A LA ROYNE D’ESCOSSE, pour lors Royne de France.

O belle et plus que belle et agreable Aurore,

Qui avez delaissé vostre terre Escossoise

Pour venir habiter la region Françoise,

Qui de vostre clarté maintenant se decore :

Si j’ay eu cest honneur d’avoir quitté la France

Voguant dessus la mer pour suivre vostre pere :

Si loin de mon pays, de freres et de mere,

J’ay dans le vostre usé trois ans de mon enfance :

Prenez ces vers en gré, Royne, que je vous donne

Pour fuyr d’un ingrat la miserable vice,

D’autant que je suis nay pour faire humble service

A vous, à vostre race, et à vostre couronne.