ODE VIII. AU ROY CHARLES, luy donnant un Leon Hebrieu.

Je vous donne pour voz estreines

L’Amour chanté par un Hébrieu :

Les cieux et les terres sont pleines

De la puissance de ce Dieu.

Ils sont (ce me semble) deux freres,

Nature double les a faits :

Ils ont aussi deux doubles meres,

Contraires en divers effaits.

L’un a le ciel pour son Empire

Qu’il peut esbranler de la main :

L’autre en la terre se retire,

Et vit de nostre sang humain.

L’un pousse les ames guidées

Aux belles contemplations,

A l’intellect et aux idées,

Purgeant l’esprit de passions :

L’autre à nature est serviable,

Nous fait aimer et desirer,

Fait engendrer nostre semblable,

Et l’estre des hommes durer.

Il nous fait la paix et la guerre :

Mais mon grand Roy, pour choisir mieux,

Prenez l’Amour qui regne en terre,

Et laissez l’autre pour les Dieux.