ODE XXIV. COMPLAINTE DE GLAUQUE à Scylle Nymphe.

Les douces fleurs d’Hymette aux Abeilles agréent,

Et les eaux de l’Esté les alterez recréent :

Mais ma peine obstinée

Se soulage en chantant sur ce bord foiblement

Les maux, ausquels Amour a miserablement

Soumis ma destinée.

Hé Scylle, Scylle, las ! ceste dolente rive,

Voire son flot piteux qui grumelant arrive

Des ondeuses campaignes,

Me plaint et me lamente, et ces rochers oyans

Mon dueil continuel, de moy sont larmoyans :

Seule tu me desdaignes.

Ce jour fut mon malheur, quand les Dieux marins eurent

Envie sus mon aise, et lors qu’ils me cognurent

De leur grande mer digne.

Las ! heureux si jamais je n’eusse desdaigné

L’art premier où j’estois par mon pere enseigné,

Ny mes rets, ny ma ligne !

Car le feu qui mon cœur ronge, poinçonne et lime,

Me vint ardre au milieu (qui l’eust creu !) de l’abîme

De leur mer fluctueuse :

Et bien en autre forme adonc je me changeay,

Que je ne fus mué alors que je mangeay

L’herbe tant vertueuse.

Pourtant si j’ay le chef de longs cheveux difforme,

Et le corps monstrueux d’une nouvelle forme

Bien peu cognuë aux ondes :

Tel honneur de nature en moy n’est à blasmer,

La mere Thetis m’aime, et m’aiment de la mer

Les Nymphes vagabondes.

Circe tant seulement ne m’aime : mais encore

Ardentement me suit, et ardente m’adore,

En vain de moy esprise.

Ainsi le bien que cent desirent, une l’a :

Une l’a voirement, et en lieu de cela

Me hait et me desprise.

Bien que Nymphe tu sois, ah cruelle ! si est-ce

Qu’indigne je ne suis de toy demy-Déesse :

Un Dieu te fait resqueste.

Thetis pour effacer cela que j’eus d’humain,

Et d’homme au temps sujet, m’a versé de sa main

Cent fleuves sur la teste.

Mais làs ! dequoy me sert ceste faveur que d’estre

Immortel, et d’aller compagnon à la destre

Du grand Prince Neptune,

Quand Scylle me desdaigne estant franc du trespas,

Et cil à qui par mort permis ne luy est pas

De changer sa fortune ?