ODE VIII. DU JOUR NATAL DE SA DAME. A Ioland Chantre.

Chanson, voicy le jour

Où la beauté qui la terre decore,

Et que mon œil peu sagement adore,

Vint en ce beau sejour.

Le Ciel d’amour atteint,

Ardant de voir tant de beautez l’admire,

Et se courbant dessus sa face, mire

Tout l’honneur de son teint.

Les celestes flambeaux,

Grandeur, Vertu, les Amours et la Grace,

A qui mieux-mieux embellirent sa face

De leurs dons les plus beaux :

Afin que par ses yeux

Tout l’imparfait de ma jeunesse folle

Fust corrigé, et qu’elle fust l’idole

Pour me guider au mieux.

Heureux jour retourné,

Mesme là bas j’auray de toy memoire,

Et vif et mort je chanteray la gloire

De l’honneur en toy né.

Despan de ce crochet

Ma lyre oisive, à fin que je l’encorde :

Donne ton livre, Ioland, que j’accorde

Ce jour sous mon archet.

Seme par la maison

Tout le tresor des prez et de la plaine,

Le liz, la rose, et cela dont est pleine

La nouvelle saison :

Puis crie au temple aussi,

Que le Soleil ne vit oncques journée,

Qui fust de gloire et d’honneur tant ornée

Comme il voit ceste-ci.