ODE VII. VOEU A LUCINE.

O Déesse puissante

De pouvoir secourir

La vierge languissante

Qui est preste à mourir,

Quand la douleur amere

D’un enfant la rend mere :

Si douce et secourable

Heureusement tu veux

D’oreille favorable

Ouyr mes humbles vœux,

J’esleveray d’yvoire

Une image à ta gloire :

Et moy la teste ornée

De beaux liz fleurissans,

Iray trois fois l’année

La parfumer d’encens,

Accordant sur ma lyre

L’honneur de ton Osire.

Descen Déesse humaine

Du ciel, et te hastant

La santé douce ameine

A celle qui l’attend,

Et d’une main maistresse

Repousse sa destresse.

Ainsi tousjours t’honore

Le Nil impetueux,

Qui Neptune colore

Par sept huis fluctueux :

Ainsi tousjours ta pompe

Danse au bruit de la trompe.

Toy Déesse Lucine

Requise par trois fois

De la vierge en gesine

Tu exauces la vois,

Et deserres la porte

Au doux fruit qu’elle porte.

Tu as de la Nature

La clef dedans tes mains,

Tu donnes l’ouverture

De la vie aux humains,

Et des siecles avares

Les fautes tu repares.