ODE XIX.

Mon Neveu, suy la vertu :

» Le jeune homme revestu

» De la science honorable,

» Aux peuples en chacun lieu

» Apparoist un demi-Dieu

» Pour son sçavoir venerable.

Sois courtois, sois amoureux,

Sois en guerre valeureux,

Aux petits ne fais injures :

Mais si un grand te fait tort,

Souhaite plus-tost la mort

Que d’un seul poinct tu l’endures.

Jamais en nulle saison

Ne cagnarde en ta maison :

Voy les terres estrangeres,

Ou fay service à ton Roy,

Et garde tousjours la loy

Que souloient garder tes peres.

Ne sois menteur ne paillard,

Yvrongne ny babillard :

Fay que ta jeunesse caute

Soit vieille devant le temps :

Si bien ces vers tu entens,

Tu ne feras jamais faute.