ODE XXI.

Quand je veux en amour prendre mes passetemps,

M’amie en se moquant, laid et vieillard me nomme :

Quoy, dit-elle, resveur, tu as plus de cent ans,

Et tu veux contrefaire encore le jeune homme !

Tu ne fais que hanir, tu n’as plus de vigueur,

Ta couleur est d’un mort qu’on devalle en la fosse :

Vray est, quand tu me vois, tu prens un peu de cœur :

» Car un gentil cheval ne devient jamais rosse.

Si tu veux le sçavoir, pren ce miroir, et voy

Ta barbe en tous endroits de neige parsemée,

Ton œil qui fait la cire espesse comme un doy,

Et ta face qui semble une idole enfumée.

Alors je luy respons : Quant à moy, je ne sçay

Si j’ay l’œil chassieux, si j’ay perdu courage,

Si mes cheveux sont noirs, ou si blancs je les ay,

Car jamais je n’appris à mirer mon visage.

Mais puis que le tombeau me doit bien tost avoir,

Certes tu me devrois d’autant plus estre humaine :

» Car le vieil homme doit, ou jamais, recevoir

» Ses plaisirs, mesme au temps qu’il sent la mort prochaine.