ODE XXIII.

Ta seule vertu reprend

Le vieil Ascrean qui ment,

Quand il dit que la Justice,

La Pitié, le saint Amour

Ont quitté ce bas sejour,

Abhorrant nostre malice.

Car icy bas j’apperçoy

Toutes ces vertus en toy :

J’en ay fait la seure espreuve.

Il n’y a foy n’amitié,

Honneur, bonté ny pitié,

Qui dedans toy ne se treuve.

Qui dira donq, Charbonnier,

Que ce vieil siecle dernier

Où Dieu l’ame t’a donnée,

Soit de fer, puis qu’aujourd’huy

Par toy lon revoit en luy

La saison d’or retournée ?