ODE XXVI.

Certes par effet je sçay

Ce vieil proverbe estre vray,

» Qu’entre la bouche et le verre

» Le vin souvent tombe à terre,

» Et ne faut que l’homme humain

» S’asseure de nulle chose,

» Si ja ne la tient enclose

» Bien estroit dedans la main.

On dit que le Ciel egal

Donne du bien et du mal

Indifferemment à l’homme :

Mais à moy malheureux, comme

Si j’estois conceu d’un chien,

Ou d’une fiere lionne,

Tousjours mal sus mal me donne,

Et jamais un pauvre bien.

Ainsi, cruel, il te plaist

De m’abbatre, et qui pis est,

Comme seul portant envie

Aux angoisses de ma vie,

Pour me faire au double choir

En toute misere extrême,

Tu me fais hayr moymesme,

Et du tout m’ostes l’espoir.