ODE I. AU ROY HENRY II.

Escoute Prince des François,

Jamais je ne confesserois

Qu’un Roy peust surmonter ta France,

Tant que ton grand Montmorency,

Et ton grand Duc de Guise aussi

Te serviront de leur vaillance.

Et tant que vivant je seray,

Jamais je ne confesseray

Qu’en France la Muse perisse,

Tant qu’elle aura pour souverain

Un Charles Cardinal Lorrain

Qui la defende, et la cherisse.

Sus donq filles de Jupiter,

C’est à ce coup qu’il faut chanter.

Ou jamais, d’une haute véne :

Je veux, enyvré de voz eaux,

Chanter deux Achilles nouveaux

Et un autre nouveau Mecéne.

Les forts Guisians que j’ay veu

Vaillans comme Mars, m’ont pourveu

D’un sujet bien digne d’Homere,

Et mon Odet, lequel me fait

De sa faveur Poëte parfait

Pour chanter l’honneur de son frere.