ODE XI.

Mais que me vaut d’entretenir

Si cherement un souvenir

Qui hoste de mon cœur le ronge,

Et tousjours me fait devenir

Resveur comme un homme qui songe !

Ce n’est pas moy, c’est toy mon cœur,

Qui pour allonger ma langueur,

Desloyal envers moy te portes,

Et pour faire un penser veinqueur,

De nuict tu luy ouvres mes portes.

Tu ne te sçaurois excuser

Que tu ne viennes m’abuser,

Et qu’à tort ne me sois contraire,

Qui veux mon party refuser

Pour soustenir mon adversaire.

Mais en qui me doy-je fier !

Quand chetif je me voy lier

De mes gens qui me viennent prendre,

Pour estre fait le prisonnier

De ceux qui me devroient defendre !

Ce penser n’eust logé chez moy

S’il n’eust eu trafique avec toy.

Sors, cœur, de ta place ancienne :

Puis que tu m’as rompu ta foy,

Je te veux rompre aussi la mienne.

Sors donq, si tu ne veux perir

De telle mort qu’on fait mourir

Le soudart, qui rompt sa foy vaine

Pour aller, traistre, secourir

L’ennemy de son Capitaine.