ODE XVI.

Ma douce jouvance est passée,

Ma premiere force est cassée,

J’ay la dent noire, et le chef blanc,

Mes nerfs sont dissous, et mes veines,

Tant j’ay le corps froid, ne sont pleines

Que d’une eau rousse en lieu de sang.

Adieu ma lyre, adieu fillettes

Jadis mes douces amourettes,

Adieu, je sens venir ma fin :

Nul passetemps de ma jeunesse

Ne m’accompagne en la vieillesse,

Que le feu, le lict, et le vin.

J’ay la teste toute eslourdie

De trop d’ans, et de maladie,

De tous costez le soin me mord :

Et soit que j’aille ou que je tarde,

Tousjours apres moy je regarde

Si je verray venir la Mort :

Qui doit, ce me semble, à toute heure

Me mener là bas, où demeure

Je ne sçay quel Pluton, qui tient

Ouvert à tous venans un antre,

Où bien facilement on entre,

Mais d’où jamais on ne revient.