ODE V. A CASSANDRE.

» La Lune est coustumiere

» De naistre tous les mois,

» Mais quand nostre lumiere

» Est esteinte une fois,

» Longuement sans veiller

» Il nous faut sommeiller.

Tandis que vivons ores,

Un baiser donnez-moy,

Donnez-m’en mille encores,

Amour n’a point de loy :

A sa Divinité

Convient l’infinité.

En vous baisant Maistresse,

Vous m’avez entamé

La langue chanteresse

De vostre nom aimé.

Quoy ? est-ce là le pris

Du labeur qu’elle a pris ?

Elle par qui vous estes

Déesse entre les Dieux,

Qui voz beautez parfaites

Celebroit jusqu’aux cieux,

Ne faisant l’air sinon

Bruire de vostre nom ?

De vostre belle face

Le beau logis d’Amour,

Où Venus et la Grace

Ont choisi leur sejour,

Et de vostre œil qui fait

Le Soleil moins parfait :

De vostre sein d’yvoire

Par deux ondes secous

Elle chantoit la gloire,

Ne chantant rien que vous :

Maintenant en saignant,

De vous se va plaignant.

Las ! de petite chose

Je me deuls sans raison :

La fléche au cœur enclose

Me tu’ sans guerison,

Que l’Archer ocieux

M’y tira de voz yeux.