ODE VI. PROPHETIE DU DIEU de la Charante.

Lors que la tourbe errante

S’arma contre son Roy,

Le Dieu de la Charante

Fasché d’un tel derroy,

Arresta son flot coy :

Puis d’une bouche ouverte

A ce peuple sans loy

Prophetisa sa perte.

Ja desja ta desserte

Te suit peuple mutin,

Qui ma rive deserte

Saccages pour butin :

Mais le cruel Destin

Que ton orgueil n’arreste,

Viendra quelque matin

Te foudroyer la teste.

Oy de Mars la tempeste

D’escailles revestu,

Et Henry qui appreste

Contre toy sa vertu.

En vain esperes-tu

Tenter son asseurance,

Qui dois estre abatu

Par le soldat de France :

Et l’avare esperance

De ton sot appareil,

Perira par l’outrance

D’un qui n’a son pareil :

Ton sang fera vermeil

Mon flot ores esclave,

Et tout le verd esmail

De ces prez que je lave.

Voicy le Seigneur brave

De Guyse qui te suit,

Et ja son loz engrave

Sus ton doz qui s’enfuit,

Prince sur tous instruit

Aux dangereux vacarmes,

Ou soit lors qu’il destruit

Les troupes de gendarmes :

Ou quand par les alarmes

De sa pique l’effort

Fait bien quitter les armes

Au pieton le plus fort.

Ne vois-tu le renfort

Que Bounivet ameine,

Prompt à haster ta mort

D’une playe inhumaine ?

Comme la nuë pleine

D’un orage odieux

Perd du bouvier la peine

Qui prie en vain les Dieux,

Le soldat furieux

Qui ja desja t’enserre,

Ton chef si glorieux

Perdra d’un grand tonnerre.

Le Comte de Sanserre

Et le Seigneur d’Iliers

Te porteront par terre

Indontez Chevaliers :

Parmy tant de miliers

Tu dois Jarnac cognoistre,

Que les Dieux familiers

Sous bon Astre ont fait naistre.

Comme l’ayant fait estre

De son haineux veinqueur,

Et de soy-mesme maistre

Commandant à son cœur :

Toy peuple sans vigueur

Tu craindras en la sorte

Qu’un loup craint la rigueur

Du lion qui l’emporte.

A la fin la main forte

Du grand Montmorency

Rendra ta gloire morte,

Et ta malice aussi :

Le Ciel le veut ainsi,

Qui ma bouche a contrainte

Prophetiser cecy

Pour t’avancer la crainte.