ODE XXXIII. A REMY BELLEAU.

Tu es un trop sec biberon

Pour un tourneur d’Anacreon,

Belleau, et quoy ! ceste Comete

Qui naguiere au ciel reluisoit,

Rien que la soif ne predisoit,

Ou je suis un mauvais prophete.

Les plus chauds Astres etherez

Ramenent les jours alterez

En ce mois, pour nous faire boire :

Boy donques : apres le trespas,

Ombre, tu ne boiras là bas

Que je ne sçay quelle onde noire.

Mais non, ne boy point, mon Belleau,

Si tu veux monter au troupeau

Des Muses, desur leur montagne :

Il vaut trop mieux estudier

Comme tu fais, que s’allier

De Bacchus et de sa compagne.

Quand avecques Bacchus on joint

Venus sans mesure, on n’a point

Saine du cerveau la partie.

Donc pour corriger son defaut,

Un vieil pedagogue il luy faut,

Un Silene qui le chastie :

Ou les pucelles dont il fut

Nourry, quand Jupin le receut

Tout vif de sa mere bruslée :

Ce furent les Nymphes des eaux :

» Car Bacchus gaste noz cerveaux,

» Si la Nymphe n’y est meslée.