ODE XV. SUR LA NAISSANCE DE FRANÇOIS, Dauphin de France, fils du Roy Henry II.

[Non rimée]

En quel bois le plus separé

Du populaire, et en quel antre

Prens-tu plaisir de me guider

O Muse ma douce folie :

Afin qu’ardent de ta fureur,

Et du tout hors de moy, je chante

L’honneur de ce royal enfant

Qui doit commander à la France ?

Je cri’ray des vers non sonnez

Du Grec ny du Latin Poëte,

Plus hautement que sur le mont

Le Prestre Thracien n’entonne

Le cor à Bacchus dedié,

Ayant la poitrine remplie

D’une trop vineuse fureur.

Il me semble desja que j’erre

Seul par les antres, et qu’au fond

D’une solitaire vallée

Je chante les divins honneurs

Du grand-pere, et du pere ensemble.

Tandis Muse, sur son berceau

Seme le liz, seme la rose,

Et mainte fueille de laurier,

L’honneur des veinqueurs és batailles :

Je prevoy qu’il vous aimera,

Et employra la mesme dextre

Dont furieux aura veincu

L’Espagnol, et l’Anglois superbe,

A polir des vers qui feront

Voler son nom par-sus la terre :

Imitateur du grand Cesar

Vaillant et sçavant tout ensemble,

Qui le jour dontoit ses haineux,

Et la nuit escrivoit ses gestes.